Дар доираи дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар Паёмашон ба Маҷлиси Олӣ баён доштанд ва дар доираи эълон гардидани соли 2026 ҳамчун «Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ», ҳамзамон ба истиқболи сазовори 35-солагии Истиқлоли давлатии Ҷумҳурии Тоҷикистон санаи 14 феврали соли 2026 Раиси ноҳияи Ҷаббор Расулов Юлдошзода Олимбек дар шаҳраку деҳоти ҷамоатҳои ноҳияи Ҷаббор Расулов дар маъракаи ниҳолшинонӣ иштирок намуданд.

Зимни шинонидани ниҳолҳо, Раиси ноҳия ба масъулони ноҳия вохӯрда, ба нақши ин ташаббус дар беҳтарсозии муҳити зист, зебоии маҳал ва афзоиши сабзазорҳои минтақа таъкид намуданд. Аз масъулони сохторҳои дахлдор талаб карда шуд, ки раванди нигоҳубини ниҳолҳои шинонидашуда зери назорати ҷиддӣ қарор гирад, то дарахтон ба таври дуруст нашъунамо ёбанд.

Ниҳолшинонӣ яке аз амалҳои нек ба шумор рафта, чун анъанаи хуб аз гузаштагон ба мо мерос мондааст.

Аз ин хотир, дар мамлакат, бахусус ноҳияи Ҷаббор Расулов, маъракаи ниҳолшинонӣ ҳамасола ба як иди сарсабзу хуррамгардонии ҳақиқӣ табдил ёфта, махсусан вобаста ба хурраму сердарахт гардонидани таллу теппаҳо мардум дар он фаъолона иштирок мекунанд.

Қобили зикр аст, ки бо супориши Раиси ноҳия Юлдошзода Олимбек дар тамоми ҳудуди ноҳия корҳои бунёдкорию созандагӣ, ниҳолшинонӣ ва кабудизоркунӣ вусъат бахшида, барои ободу зебо гардонидани ҳар як деҳа, маҳалла, ҷамоатҳои шаҳраку деҳот тадбирҳои самарабахш андешида шуда истодааст.

Санаи 13 феврали соли 2026 Раиси ноҳияи Ҷаббор Расулов Юлдошзода Олимбек бо ҳамроҳии гуруҳи кории мақомоти иҷроияи ҳокимияти давлатии ноҳияи Ҷаббор Расулов ва як қатор масъулини ноҳия бо мақсади огоҳӣ аз вазъи нархи маҳсулоти ниёзи аввалия ва шиносоӣ бо раванди корҳои ободонӣ дар ҳудуди бозори марказии «Ашроф» аз ин маркази савдои ноҳия боздид намуданд.

Раиси ноҳия зимни шиносоӣ бо фурӯши маҳсулотҳои гуногун, пеш аз ҳама таваҷҷуҳ ба нархи он намуда, аз масъулини дахлдор даъват ба амал оварданд, ки нархҳо танзим ва то ба қадри имкон поён оварда шавад.

Дастур дода шуд, ки дар бозор- камераҳо насб гардад;- оиди пешгирии ҳолатҳои сӯхтор чораҳои иловагӣ андешида шавад;- нарху навои бозор муътадил нигоҳ дошта шавад;- тозагии ободонии ҳудуди бозор ба танзим дароварда шавад.

Таъкид шуд, ки фаровоннамоии маҳсулоти бозор тибқи дастуру супориш ва ҳидоятҳои Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сурат гирифта, ҳадаф пеш аз ҳама дастрасии нархи маҳсулоти ниёзи аввалия ба ҳама табақаҳои ҷомеа мебошад.

Ҳамзамон таъкид шуд, ки бояд нархи фурӯши маҳсулот арзон карда шавад. Ин иқдоми тоҷирон ба баракати савдо ва хонадони онҳо оварда мерасонад.Зимни суҳбат бо фурӯшандагони бозори «Ашроф» Раиси ноҳияи Ҷаббор Расулов Юлдошзода Олимбек аз тадбирҳои муҳими Ҳукумати мамлакат дар самти таъмини амнияти озуқаворӣ маълумот дода, даъват ба амал оварданд, ки барои афзун намудани маҳсулот ва поён фаровардани нархи он саъй намоянд.

Дар фароварди боздиди худ Раиси ноҳияи Ҷаббор Расулов Юлдошзода Олимбек аз бозори марказии «Ашроф» ба тезонидани раванди корҳои ободонию созандагӣ ба истиқболи 35 – солагии Истиқлоли давлатии Ҷумҳурии Тоҷикистон дастуру супоришҳои мушаххас дода, таъкид карданд, ки бозор оинаи ноҳия аст ва сайёҳони дохилию хориҷӣ аз бозор боздид мекунанд ва он бояд ҳамеша тозаву ороста ва ободу зебо бошад.